O xurado destaca a calidade da tradución ao galego do texto en inglés
O Premio do Ministerio de Cultura para a tradución ao galego do Ulises
de Joyce súmase aos outros galardóns que o traballo de anos da equipa
formada por María Alonso Seisdedos, Eva Almazán, Xavier Queipo e Antón
Vialle recibiu desde que o libro saíu publicado na editorial Galaxia. A
totalidade dos premios para traducións publicadas en libro no 2013
caeron na magna obra, un esforzo inmenso nun momento no que o mundo
editorial está a recuar na publicación de tradución tamén pola redución
do apoio institucional.
