“Se o galego é un dereito fundamental en Galicia, carece de sentido falar de imposición do galego no seu territorio". O profesor Monteagudo foi claro e directo ao referirse á situación actual da lingua galega. “En realidade ocorre é que hai persoas e estamentos sociais que aspiran a vivir e desenvolverse en Galicia ignorando a súa lingua".
No seu discurso 'Facer país co idioma. Sentido da normalización lingüística', Monteagudo cualificou de "falacia" a imposición do galego e a contraposición entre "normalización e liberdade lingüística". "É unha falacia que nace tanto dunha serie de malentendidos da primeira como de lecturas tendenciosas da segunda", sentenciou.
“A liberdade lingüística é unha condición esencial da normalización, do mesmo xeito que a normalización é condición esencial da liberdade lingüística", suliñou ao tempo que destacou que a normalización "ben entendida" ten como obxectivo establecer "as condicións do exercicio da liberdade dos falantes".
O novo académico denunciou a “grave crise” que sobre este idioma. “ É un cataclismo que se inscribe noutro moito máis amplo e que está a dar lugar a un modelo económico, social e cultural que ameaza con engulir as conquistas de traballadores, vincular á escravitude á maioría do xénero e esnaquizar definitivamente o patrimonio cultural do que forma parte inseparable a diversidade lingüística".
